Superliga shqiptare luan sot derbin e kryeqytetit mes Partizanit dhe Tiranës. Në 19:00 të gjitha rrugët të çojnë në "Air Albania", për ndeshjen më të 'luftuar' në vend. Përballja e sotme është e treta për këtë sezon dhe vlen për javën e 24-t.
Tanimë në rrugët e kryeqytetit ka nisur edhe organizimi nga ana e dy tifozerive. Ata të Partizanit janë nisur nga zona e "21 Dhjetorit" dhe duke ndjekur drejtimin e Unazës së Vogël po i drejtohen stadiumit.
Nga ana tjetër, tifozët e Tiranës janë grumbulluar në qendër të qytetit dhe duke ndjekur Bulevardin "Dëshmorët e Kombit" dhe një pjesë të Rrugës së Elbasanit po i drejtohen "Air Albanias".
Policia po shoqëron dy grupet e tifozëve me qëllimin që mos ketë asnjë incident mes tyre. Nga pamjet e siguruara duket se tifozët e kanë "ndezur" atmosferën duke mbështetur ekipin e preferuar dhe hedhur flakadanë e tymuese. Kontrolli për hyrjen në stadium do jetë i rreptë, për mos u futur sende të palejuara dhe mjete piroteknike.
S.DH/ReportTv.al
