Nga data 17 shkurt nuk do të jetë më e nevojshme një pasaportë COVID apo një test negativ për të udhëtuar drejt Zvicrës. Ky vendim u mor ditën e sotme në mbledhjen e zhvilluar nga Këshilli Federal, që e argumentuan me situatën pozitive të koronavirusit në vend, ku numri i shtrimeve në spital është ulur ndjeshëm.
Ndërkohë, pasaporta anti-COVID nuk do të kërkohet më as në bare, restorante apo ambiente të tjera publike. Mbajtja e maskave në ambientet e punës si edhe aplikimi i punës nga ambientet e shtëpisë për pozicionet që ishte e mundur nuk do të aplikohet më.
Deri në fund të marsit do të mbetet në fuqi mbajtja e maskave në transportin publik dhe në spitale me qëllim që të mbrohen grupet e rriskuara.
Karantinimi për personat e infektuar me COVID-19 do mbetet në fuqi deri më 31 mars, por kjo masë do të rishqyrtohet në varësi të situatës epidemiologjike. Këshilli Federal tha se në 1 prill pritet që vendi të rikthehet normalitetit dhe nuk do të zbatohet më asnjë masë anti-COVID.
Autoritetet shëndetësore do të vazhdojnë të lëshojnë certifikata anti-COVID për qytetarët zviceranë, për t’iu mundësuar atyre udhëtimin në vendet e BE-së.
SI.E./ReportTv.al