Partia Demokristiane, e drejtuar nga Nard Ndoka, ka depozituar një kërkesë pranë Komisionit Qendror të Zgjedhjeve për t'u regjistruar si parti në zgjedhjet e pjesshme vendore për kryetar bashkie në bashkitë Shkodër, Dibër, Vorë, Durrës, Rrogozhinë e Lushnjë.
PDK është partia e katërt që regjistrohet në këto zgjedhje, pas LSI-së PS dhe PD-së. Partia Socialiste dhe Partia Demokratike u regjistruan në zgjedhje më datën 25 janar, ndërsa LSI u regjistrua një ditë më parë. Afati i fundit për të depozituar kërkesën për regjistrimin në zgjedhjet e pjeshsme vendore është 31 janari.
Nga ana tjetër Sali Berisha nuk është regjistruar ende në zgjedhje, ndërsa ka deklaruar se do të votojnë të dielën kandidatët potencialë dhe më i votuari prej tyre do të zgjidhet kandidati zyrtar i Komisionit Të Rithemelimit. Këta të fundit shpresojnë që PD zyrtare të pranojë verdiktin e anëtarësisë për emrin që do të përballet me socialistët.
