Dy të rinj janë vënë në pranga nga Policia e Tiranës, pasi vidhnin biçikleta dhe monopatina në zona të ndryshme të Tiranës.
Të rinjtë e arrestuar, D. Sh., 18 vjeç dhe S. H., 19 vjeç, në bashkëpunim me 17-vjeçarin e shpallur në kërkim, dyshohet se më 1 tetor 2023, kanë vjedhur një monopatinë në Rrugën e Kavajës.
Nga verifikimet e kryera ka rezultuar se S.H, siguronte sendet e vjedhura nga D. Sh. dhe nga 17-vjeçari, të cilat më pas i shiste kundrejt përfitimeve të ndryshme monetare.
Për pasojë, dy të rinjtë u vunë në pranga, ndërsa bashkëpunëtori i tyre 17-vjeçar është shpallur në kërkim.
Gjithashtu, u vu nën hetim K. L., 19 vjeç, banues në Tiranë, i cili teksa shoqëronte D. Sh., iu gjet një sasi lënde e dyshuar narkotike kanabis.
Ndërsa gjatë kontrollit të ushtruar në banesën e S. H., uniformat blu gjetën një biçikletë elektrike dhe 4 monopatina, të dyshuara të vjedhura, të cilat u sekuestruan në cilësinë e provës materiale, së bashku me lëndën narkotike.
Materialet procedurale i kaluan Prokurorisë Tiranë, për veprime të mëtejshme.
M.T/ReportTv.al