Al Nassr fitoi 4-3 kundër Al Ahli për raundin e shtatë në futbollin elitar të Arabisë Saudite dhe merr vendin e këtyre të fundit. Në këtë duel shënoi dopietë edhe Cristiano Ronaldo. Portugezi udhëhoqi të tijtë drejt tri pikëve, me sukesin që u ndoq nga afro 27 mijë tifozë në Riad.
Ndeshja u zhbllokua nga Ronaldo në minutën e katërt , teksa Talisca dyfishoi për vendasit. Ishte Frank Kessie që shkurtoi shifrat te miqtë, ndërsa sërish Talisca shënoi për 3-1. Në pjesën e dytë Mahrez shkurtoi për miqtë sërish, këtë herë nga penalltia.
Do duhej Ronaldo që të shënonte dopietë për vendasit, ndërsa Brikan vulosi shifrat në 4-3. Me këtë sukses Al Nassr shkon në kuotën e 15 pikëve për vendin e pestë, aq pikë sa ka edhe Al Ahli që pozicionohet një vend më poshtë.
CR7 këtë sezon ka shënuar nëntë gola, ndërsa goli i parë i kësaj mbrëmjeje ishte "i padukshëm". Për shkak të tymueseve në fushë, goditja e tij që përfundoi në rrjetë nuk u kap nga kamerat.
