Tre persona kanë rënë në prangat e policisë së Tepelenës pasi dyshohet se shpërndanin lëndë narkotike. Gjatë arrestimit, u kapën me një sasi të madhe parash, 18,520 euro të sekuestruara në cilësinë e provës materiale.
Nga operacioni i koduar ‘Transporter 3’, u arrestuan Fatjon Dule, Perikli Naci dhe Vaso Mëkshi, të tre banues në Sarandë.
Në hyrje të qytetit të Tepelenës, shërbimet e Policisë kanë ndaluar automjetin me drejtues Vaso Mëkshin dhe pasagjerë Dulen dhe Nacin. Në makinë u gjetën një sasi lënde e dyshuar narkotike cannabis sativa, një armë e ftohtë (thikë), 8390 euro dhe 8 aparate celulare.
Gjatë kontrollit fizik të ushtruar ndaj Perikli Nacit, u gjet një sasi tjetër lënde e dyshuar narkotike cannabis sativa, ndërsa gjatë kontrollit fizik të ushtruar ndaj Fatjon Dules, u gjetën 2140 euro.
Gjithashtu, nga kontrolli i ushtruar në banesën e Vaso Mëkshit u gjetën 7990 euro.
Në cilësinë e provës materiale u sekuestruan në total 18 520 euro, arma e ftohtë, lënda narkotike, 8 aparate celulare dhe automjeti. Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
//ReportTv.al