Prej më shumë se 40 ditësh vendi është në shtetrrethim dhe mërzia është ulur këmbëkryq mes qytetarëve, por në kryeqytet për ta thyer sadopak këtë monotoni ka menduar banda frymore e qytetit, e cila ka luajtur disa pjesë orkestrale.
Për të thyer heshtjen gjatë kësaj fundjave të Pashkës Ortokodokse, banda e qytetit ka gjallëruar rrugët e Tiranës duke performuar live. Koncerti i bandës frymore është shtrirë përgjatë rrugës së Kavajës, me pallate të kuruara në të dy anët, tek rruga e Durrësit, dhe më tej tek zona e Tiranës së Re. Repertori me motive festive dhe pranverore ka zgjuar kryeqytetasit në ditën e Pashkës me tinguj të ngrohtë, duke mbushur me gjallëri rrugët e Tiranës edhe në këto ditë karantine.
Përmes këtij aktiviteti, Agjencia e Parqeve dhe Rekreacionit në Bashkinë e Tiranës synon që t’iu kthejë momente sa më festive dhe argëtuese banorëve të qytetit.
Kjo duket si diçka e goditur nga organizatorët duke patur parasysh që nga e premtja në orën 17:30 dhe deri të hënën në orën 05:00 çdo qytetar duhet të qëndrojë në shtëpi.
Ne.k.//ReportTv.al