Përdhunimi i 15-vjeçares në periferi të Tiranës nga roja i shkollës ka sjellë solidarizim mbarëshoqëror. Në muret e kryeqytetit janë parë mbishkrime të ndryshme ku shkruhej “Mos përdhuno!”, “Ti nuk ke faj, faj ka përdhunuesi!”, “Pedofilët e kanë vendin në burg jo në shkollë”.
Shqiptarët kanë reaguar ashpër kundër këtij fenomeni që sa vjen dhe shtohet dita ditës dhe më e keqja është se denoncohet shumë pak për shkak të frikës apo mentalitetit të vjetër shqiptar.
Kujtojmë se ditën e sotme Forumi Rinor i Partisë Demokratike është mbledhur përpara ministrisë së Arsimit, duke kërkuar dorëheqjen e ministres Besa Shahini pasi nuk ka bërë asnjë reagim për rastin e 15-vjeçares e cila është përdhunuar nga roja i shkollës dhe 3 nxënës të tjerë.
Kujtojmë se e mitura 15-vjeçare është përdhunuar në mënyrë të vazhdueshme për një vit nga roja i shkollës në të cilën shkonte, pasi ai e kërcënonte se do të publikonte disa fotot të saj me një djalë.
