ZVICËR - Tre vite më parë investuan në Shqipëri te klubi i Egnatias, ndërsa sot Shqiprim Berisha dhe Sammuel Hass marrin drejtimin e Schaffhausen në Ligën e Dytë të futbollit zviceran.
Shqiprim Berisha do të jetë drejtori i ri ekzekutiv i FC Schaffhausen, ndërsa ish-sulmuesi shqiptaro-zviceran, Admir Mehmedi do të jetë drejtori sportiv i ekipit të Challenge League.
Pas një aventure në drejtimin e Grasshopers, tanimë Berisha me partnerët e tij kanë detyrë të rikthejnë në "shina" një ekip të traditës si Schaffhausen.
“FC Schaffhausen është një klub tradicional”, thotë i lumtur Jimmy Berisha në konferencën për shtyp.
“Ka një infrastrukturë të madhe dhe një departament të vogël me shumë potencial. Synimi prioritar dhe urgjent, si dhe baza për hapat e mëtejshëm, është përmirësimi i situatës sportive”, tha Berisha.
Kujtojmë se në 2020 investitorët kërkuan që mos ishin thjeshtë sponsorizues te Egnatia, por ta privatizonin klubin, gjë që nuk u arrit asokohe.
