Është zbardhur dhe dokumentuar ngjarja që ndodhi një natë më parë në fshatin Ferras, në Divjakë, ku u qëllua me armë zjarri në ajër, në afërsi të banesës së shtetasit Pellumb Beqiri, i cili ka qenë ish-efektiv i FNSH në Fier.
Policia ka arrestuar në flagrancë një 28-vjeçar me iniciale G.L, banues në Lushnje për veprën penale "Armëmbajtja pa leje", "Prishja e qetësisë publike" dhe "Kanosja" e kryer në bashkëpunim.
Gjithashtu u proceduan penalisht shtetasit P. G., 47 vjeç, banues në Lushnjë, për veprën penale "Kanosje" e kryer në bashkëpunim; K. N., 20 vjeç, banues në Lushnjë dhe E. B., 32 vjeç, banues në Golem, Lushnjë, për veprën penale "Moskallëzim i krimit".
Sipas policisë, në përfundim të veprimeve të para hetimore ka rezultuar se shtetasi G. L., në bashkëpunim me tre shtetasit e proceduar, ka qëlluar për motive të dobëta, me armë zjarri automatik në ajër, në afërsi të banesës së shtetasit Pëllumb Beqiri, në fshatin Ferras.
Nga këqyrja e vendit të ngjarjes është sekuestruar një gëzhojë armë zjarri automatike.
Materialet i kaluan Prokurorisë pranë Gjykatës së Shkallës së Parë Lushnjë, për veprime të mëtejshme procedurale.
M.Q.//ReportTv.al