Kek me limon
Përbërësit:
4 vezë
1 filxhan çaji e 2 lugë gjelle sheqer
1 filxhan çaji qumësht
2 filxhan kafe vaj bimor
1 filxhan kafe lëng limoni
Lëkura e një limoni
300 gr miell
Përgatitja: Në një tas rrahim vezët, shtojmë sheqerin dhe i përziejmë së bashku derisa sheqeri të shkrijë dhe vezët të zbardhen. Shtojmë qumështin dhe i përziejmë, shtojmë vajin dhe lëngun e limonit, lëkurën e limonit, miellin e situr, pluhurin pjekës dhe i përziejmë së bashku derisa të na formohet një masë që derdhet rrjedhshëm, jo i trashë. Lyejmë një tepsi keku me gjalp dhe e pudrosim me miell. Shtojmë brumin e kekut dhe e vendosim në furrën e parangrohur në temperaturë 175-180 gradë, për 40 minuta.
Krem lulelakër me arra dhe pançetë
Përbërësit:
800 gr - 1 kg lulelakër
Gjalp
2 qepë të vogla
4 feta pançetë
1 filxhan çaji qumësht
4 lugë gjelle pana gatimi
2 lugë gjelle parmixhan
Kripë dhe piper i zi
50 gr arra
Feta buke ose bagetë
Pastrojmë lulelakrën dhe e vendosim në tenxhere të copëtuar në lule. Shtojmë ujë dhe e lëmë të ziejë për 20 minuta. Në një tenxhere vendosim 40 gr gjalp, e shkrijmë dhe shtojmë në të qepën të grirë shumë hollë. Shtojmë pançetën të prerë në copa 2 cm. I kaurdisim derisa pançeta të theket dhe të marrë ngjyrë të kuqerrëmtë. E largojmë pançetën nga tenxherja dhe e lëmë mënjëanë. Me ndihmën e një kullese largojmë lulelakrën nga uji dhe e shtojmë në tenxheren me qepë. Shtojmë në këtë tenxhere edhe 1 garuzhde nga uji ku ziem lulelakrën dhe i trazojmë së bashku derisa të marrë shijen me qepën. Kalojmë lulelakrën në blender dore dhe e kthejmë atë në pure. Shtojmë një filxhan qumësht, panën, pamixhanin, kripë dhe piper të zi. I përziejmë përsëri me blender. Copëtojmë arrat në copa të dukshme. Thekim disa feta bagetë dhe servirim lulelakrën duke e dekoruar me një fetë bagëtë të thekur, disa copa pançetë të skuqur dhe një lugë gjelle arra të copëtuara. Ju bëftë mirë.
