Shtatë persona duke përfshirë disa civilë u vranë të mërkurën pas një sulmi me dron në një fabrikë armësh që i përkiste fraksioneve të mbështetura nga Irani në Sirinë lindore të kontrolluar nga qeveria.
Nuk është e qartë se kush qëndron pas sulmit në provincën Deir Ezzor, ku fraksionet e mbështetura nga Irani kanë ndikim dhe ku një koalicion i udhëhequr nga SHBA dhe Izraeli kanë kryer më parë sulme.
“Shtatë persona u vranë dhe 15 u plagosën në një sulm me dron që synonte një fabrikë armësh dhe një kamion të ngarkuar me armë”, tha Rami Abdel Rahman, i cili drejton Observatorin Sirian për të Drejtat e Njeriut me qendër në Britani.
Tre luftëtarë pro-iranianë nga Afganistani, tre civilë sirianë dhe një sirian i paidentifikuar u vranë, tha Abdel Rahman për AFP, duke shtuar se ndërtesa e shënjestruar vetëm kohët e fundit u shndërrua në një fabrikë armësh.
Izraeli ka kryer sulme të përsëritura ajrore dhe raketore kundër forcave qeveritare dhe aleatëve të tyre të mbështetur nga Irani në Siri që nga shpërthimi i luftës civile në vitin 2011. Ai rrallë komenton mbi operacionet ushtarake individuale.
Një koalicion i udhëhequr nga SHBA që lufton trupat e grupit militant ‘DEASH’ në Irak dhe Siri, ka kryer gjithashtu sulme kundër luftëtarëve pro-Iranit në Siri në të kaluarën.
B.V/ReportTv.al“Sulmi i së mërkurës kishte në shënjestër një pjesë të Deir Ezzorit që është shtëpia e rezidencave të komandantëve të lartë iranianë dhe oficerëve të lartë të lëvizjes Hezbollah të Libanit, si dhe një spital iranian për pacientët me kolerë”, tha Abdel Rahman.
