Sekretari i Përgjithshëm i NATO-s, Jens Stoltenberg, beson se pavarësisht përpjekjeve të mëdha ushtarake, Rusia nuk do të jetë më në gjendje të arrijë objektivat e saj të luftës në Ukrainë.
“Qëllimi i pushtimit të urdhëruar nga presidenti rus Vladimir Putin ishte të parandalonte Ukrainën që të afrohej me NATO-n dhe Bashkimin Evropian. Pas gati dy vitesh luftë, Ukraina tani është më afër se kurrë me NATO-n dhe BE-në“, tha Stoltenberg, sipas të cilit Putin e ka humbur përgjithmonë Ukrainën, raportojnë mediat e huaja.
Shefi i NATO-s tha në një intervistë për Dpa se kjo është një humbje serioze strategjike për Rusinë, duke shtuar se ai është i sigurt se Ukraina do të arrijë përfundimisht qëllimin e saj për t’u bashkuar me NATO-n.
Stoltenberg theksoi gjithashtu se Rusia po paguan një çmim jashtëzakonisht të lartë për luftën e saj. Moska tashmë ka humbur qindra avionë dhe mijëra tanke, dhe 300,000 ushtarë janë vrarë ose plagosur.
S.S/ReportTv.al