Gjykata e Posaçme ktheu sot (3 korrik 2023) për hetim në SPAK dosjen e Selim Çekajt, babait Arbër Çekajt, i dënuar më 14 vite burg pasi u kap me 613 kg kokainë
SPAK kërkoi pushimin e çështjes më 11 maj pas dy vitesh hetime me argumentin se nuk kishte prova të mjaftueshme. Por gjykata nuk ishte dakort me këtë kerkesë të SPAK, duke e kthyer çështjen në hetim.
Selim Çekaj, u arrestua në prill të vitit 2021 pasi në kontejnerin e tij me banane të kompanisë së tij ‘EcoAlmax’, u kapën 49 kg kokainë. Më pas doli nga qelia në tetor të vitit 2021, kur Apeli i GJKKO vendosi masën e sigurisë ‘arrest shtëpie’ nga ‘arrest me burg’, duke i lehtësuar masën për shkak të moshës, por edhe si pasojë e problemeve shëndetësore.
Çekaj vijon të jetë ende në arrest shtëpie
Selim Çekaj është babai i Arbër Çekaj, i cili është i dënuar me 14 vite burg pasi u kap me 613 kg kokainë në magazinat e kompanisë së tij të bananeve 'Arbri Garden' në Maminas po brenda një kontejneri. Në të njëjtën skemë u kap edhe Selim Çekaj, ku në kontejnerin ku ai priste bananet e porositura me firmën e tij EcoalMax nga Ekuadori policia zbuloi të fshehur 49 kg kokainë.
Kontejneri i Selim Çekajt ishte nën vëzhgim prej 1 muaji dhe se kokaina ishte e ndarë në 31 pako e vendosur në shtyllat anësore të kontejnerit me banane, ndryshe nga sasia prej 613 kg kokainë që u kap i biri i 72-vjeçarit, Arbër Çekaj, që kishte fshehur në dyshemenë e kontejnerit me banane.
G.MO//ReportTv.al