GREQI-Dënimi me burgim të përjetshëm u vendos për pesë të pandehurit kryesorë, në çështjen e bujshme të trafikut të 1.2 tonë kokainë që u soll në fshatin nga Agios Vikentios në Astakos, Etoloakarnania, në janar 2020 nga Karaibet, ku protagonistë ishin edhe shqiptarë. Për rastin, u ulën në bankat e tgë akuzuarve një total prej 13 personash, në një gjyq që përfundoi të Premten e kaluar nën masat drakoniane të sigurisë dhe me dëshmitarë të mbrojtur.
Mes pesë të dënuarve me burgim të përjetshëm është një kriminel shqiptar 42-vjeçar, Aleksandër Pemaj. Ai u arrestua në cilësinë e organizatorit. Pemaj konsiderohej si ‘tmerri’ i policisë greke dhe është dënuar disa herë nga drejtësia greke për vepra penale tepër të rënda. Mediat greke shkruajnë se Aleksandër Pemaj njihet si miku i ngushtë i Marian Kolajt. Ky i fundit është një i arratisur nga burgjet greke, i cili u vra nga policia greke gjatë përleshjes me armë në kufi me Shqipërinë. Ai ishte personi përgjegjës për të gjitha detajet për trafikun e drogës, nga gjetja e jahtit, ekuipazhi dhe koordinimi i transportit.
1 ton e 181 kg kokainë janë sekuestruar më 24 janar të vitit 2020 në një super operacion në Greqi, ndërsa janë vendosur në pranga tetë trafikantë, mes të cilëve 6 shqiptarë. Shqiptarët e tjerë të arrestuar ishin Arbër Përdeda, Ergon Tusi, Erlin Zotaj, Lek Doda, Maksim Preçi.
Operacioni u zhvillua në bashkëpunim me DEA-n amerikane, si dhe autoritetet shqiptare në Agrinjo, pranë Patras. Droga ishte fshehur në një kompleks dhomash plazhi të marrë me qira në fshatin Astakos pranë qytetit të Agrinjos. Sipas medieve greke origjina e kokainës ishte nga Karaibet, ishujt Shën Vincent, ndërsa nga andej ishte transportuar me jaht drejt Greqisë nga karteli, që kishte drejtues një shqiptar. Greqia ishte planifikuar që të ishte ndalesa e parë e kokainës, ku një pjesë do të mbetej në vendin fqinj, ndërsa tjetra do të shpërndahej, një pjesë në Europën Veriore dhe pjesa tjetër në Afrikën e Veriut.
K.T.//ReportTv.al