ITALI- Ish kryeministri Italian Silvio Berlusconi prej ditës së djeshme është i shtruar në spital në njësinë e kujdesit intensiv të spitalit San Raffaele në Milano. Lajmi për shtrimin e tij në spital ka marrë vëmendjen e mediave, ndërsa janë zbuluar detaje të reja.
Mediat italiane shkruajnë se Berlusconi është diagnostikuar me leucemi. Lideri 86 vjeçar i Forca Italia u shtru në spital pasi iu shfaqën probleme me frymëmarrjen. Ministri i Jashtëm italian, Antonio Tajani tha se nata e parë në spital kaloi i qetë për Berlusconin dhe se gjendja e tij shëndetësore është e qëndrueshme.
"Unë fola me profesor Zangrillo këtë mëngjes. Ai më tha se Berlusconi kaloi një natë të qetë dhe kushtet e tij janë të qëndrueshme. Mënyra më e mirë për ne që të jemi pranë tij është të punojmë”, tha Tajani.
Berlusconi do të qëndrojë në spital për disa ditë ndërsa me të është edhe partnerja e tij Marta Fascina, fëmijët si dhe vëllai i tij Paolo dhe motra Licia Ronzulli. Mesazh për shërim të shpejtë erdhën nga eksponentë politikë të të gjitha partive, përfshirë edhe kryeministren Giorgia Meloni.
“Një urim i sinqertë për një shërim të shpejtë për Silvio Berlusconin, i shtruar në spitalin San Raffaele në Milano. Forca Silvio”, shkroi Meloni.
Ndërkohë, vëllai i tij Paolo Berlusconi tha se Silvio është një shkëmb, do t'ia dalë edhe kësaj radhe". Kreu i partisë së qendrës së djathtë ‘Forza Italia’ ishte i shtruar në të njëjtin spital javën e kaluar dhe u largua ditën e enjtë pasi u përmirësua gjendja shëndetësore.
Silvio Berlusconi filloi kimioterapinë për të luftuar një formë të leucemisë që e goditi dhe e detyroi të shtrohej në njësinë e kujdesit intensiv në spital në Milano. Administrimi i parë u bë dje, pas shtrimit në spital. Mësohet se gjendja e tij është stabile.
