TIRANË- Në një intervistë në ‘’ Rreze dielli’’ folëm për sigurinë ushqimore në treg dhe disa mënyra se si mund të arrijmë të kuptojmë cilat ushqime janë të freskëta apo jo. Inspektorja e AKU-së Yllka Allaraj, ndër të tjera foli për sigurinë e ushqimit në kohë pandemie dhe theksoi rëndësinë e të gatuarit në mënyrën e duhur mishin e ngrirë, për të mos humbur vlerat e tij ushqimore:
‘’Nuk ka asnjë të dhënë statistikore apo studim shkencor që na vërteton që nga konsumimi i produkteve ushqimore jo të sigurta mund të na shfaqet covid-i, por Task Forca e autoritetit kombëtar të ushqimit operon në zbatimin e protokollit të miratuar nga ministria e shëndetësisë për mbajtjen e maskave, për ruajtjen e distancave dhe për kushtet higjeno-sanitare të biznesit ushqimor’’ u shpreh inspektorja e Aku-së.
Ajo tregoi edhe rëndësinë e të gatuarit në mënyrën e duhur mishin e ngrirë, për të larguar elementët kontaminues që mund të përmbajë produkti:
‘’Koha e freskisë së mishit varion nga 5-7 ditë, deri në këtë periudhë kohore mund të konsiderohet i freskët, pas kësaj periudhe kohore, operatorët e biznesit ushqimor kanë gjithë të drejtën që këtë produkt ta ruajnë në kushte frigoriferike të ngrira, në dhoma frigoriferike në temperatura që variojnë nga nga -16 deri në -19 gradë celsius, por mishi i ngrirë, vjen shumë edhe si mish importi, domethënë Shqipëria importon edhe shumë mish të ngrirë, siç janë vendet e Brazilit, Kanadaja dhe shumë vende të tjera’’ tha ajo.
Ndërsa theksoi se mishi i ngrirë nuk i humb vlerat e tij ushqimore por problemi ndodh gjatë shkrirjes, sepse mënyra e përdorur është e gabuar:
‘’ Shumë konsumatorë mendojnë se me ruajtjen e mishit në formë të ngrirë, ulen vlerat ushqimore, jo nuk ndryshojnë vlerat ushqimore, problemi i mishit të ngrirë është kur shkrihet, dhe nuk duhet ta ngrijmë përsëri, nuk duhet që mishi i ngrirë të kalohet direkt me ujë të ngrohtë, sepse mikroflora që ka mishi I ngrirë bën të mundur që me ujin e nxehtë të ulen cilësitë, e dyta të ketë një rritje të mikroflorës, të baktereve, dhe të na bëjë kështu të mundur që mishi të jetë i kontaminuar’’ tha ajo.
Po ashtu është e rëndësishme që mishi mos të shkrihet menjëherë, por të qëndrojë në frigorifer në kushtet e freskisë:
‘’ Përpos kësaj pjesa nga kalimi i ngrirjes, deri në proçesin e gatimit amvisat duhet ta dinë, që ta vendosin në kushte freskie, tek frigoriferi , në një raft të pjesës së frigoriferit, ku poshtë të ketë vendosur një tavë, që gjatë shkrijes mos të pikojë, dhe të na kontaminojë produktet e tjera, dhe kjo duhet të qëndrojë për një afat kohorë për dy orë, dhe pastaj pas dy orësh, mund të kalojë nga frigoriferi në kushte freskuese’’ u shpreh ajo.
Të gjithë konusmatorët duhet të tregojnë kujdes me ngjyrën, konsistencën, prishjen e strukturës edhe aromën e produktit përpara blerjes së tyre.
D.M./ReportTv.al
