Në rubrikën “Bima dhe Shëndeti” në emisionin e mëngjesit “Rreze Dielli” në Report Tv me specialistin e bimëve mjekësore Ylli Merja flasim për mykun e thonjve, cilët janë shkaktarët e këtij myku, simptomat, si dhe tregojmë disa mënyra sesi të trajtojmë në kushte shtëpie mykun e thonjve të këmbëve dhe duarve.
Infeksionet mykotike mund të prekin çfarëdo lloj pjese të trupit. Thonjtë preken nga ky infeksion kur myku godet thonjtë e gishtave, majën e këmbës ose lëkurën poshtë thonjve. Infeksionet mykotike prekin më zakonisht pjesën e majës së këmbëve dhe thonjve, pasi është një pjesë që zakonisht qëndron e mbyllur në këpucë, në një ambient të ngrohtë dhe me lagështi.
Sipas specialistit Merja “myku është normalisht prezent brenda dhe jashtë trupit dhe kur një sëmundje kërpudhore fillon të rritet së tepërmi atëherë mund të merrni infeksion dhe mund të krijohen problematika të tjera”.
Shkaktarët e mykut të thonjve sipas specialistit Merja janë:
- Kërpudha fijëzore (dermatitet) që dobësojnë dhe shkurtojnë thoin
- Myku i bardhë (candita albicans) merret nga ambientet publike, monedhat, frutat
- Mykozat e patrajtuara mirë më parë
- Djersitja, lagështira, errësira
- Çrregullimet e qarkullimit të gjakut qoftë nga sëmundja e diabetit ose nga osteoporoza
- Këpucët e ngushta
Ndërsa simptomat e mykut janë tejet të dukshme dhe të qarta: dobësohet struktura e thoit dhe bëhet si e fijëzuar; kemi trashje të thoit, shtrembërim, forcim; ndryshim i ngjyrës nga para dhe anash, shkaku është dermatofiti, kërpudha fijëzore; ndryshimi i ngjyrës në bazë nga myku; çarja e lëkurës midis gishtave dhe formimi i fluskave me ujë.
Merja jep disa këshilla për të patur këmbë të pastra dhe thonj të shëndetshëm “Shpëlani këmbët me ujë, kripë dhe sodë. Në rast se vëreni djersitje të këmbëve, ndërroni shpesh çorapet dhe këpucët çdo ditë. Nëse keni kruajtje, përdorni për shpëlarje çaj rigoni ose trumze ose gjethe mushmolle. Nëse ju qëndrojnë këmbët e lagura përdorni pudër. Mos përdorni këpucë që ju shtrëngojnë këmbët, ndërsa çorapet duhet të lahen me ujë të nxehtë mbi 65 gradë C që të shkatërrohen sporet”.
Specialisti i bimëve mjekësore Ylli Merja rekomandon trajtimin alternativ, i cili është shumë i suksesshëm dhe nëse ndiqet hap pas hapi, myku do të largohet brenda 2 ose 3 javëve.
- Përgatisni çajin antimyk me degë trumze, gjethe ftoi dhe rigon. Shpëlani këmbët me 1 gotë çaj myku dhe 1 lugë kafe sodë buke
- Pasi thahet çaji, lyeni thonjtë dhe lëkurat e ashpërsuara me propolis me rigon
- Pasi thahet propolisi me rigon vendosni kremin e mykut në mbrëmje, kremin me rigon gjatë ditës
- Nëse gjuha është e zbardhur pastrojeni në mëngjes esëll me furçën e dhëmbëve me pastë
- Pini 2 herë nga 1 gotë në ditë çaj myku
- Pini propolis me rigon 3 x 10 pika në ditë pas buke
- Kujdes! Nëse thoi është trashur shumë lyejeni me vaj rigoni 2 x 1 pikë vaj mbi thua. Nëse thoi është bërë i hollë dhe këputet, lyejeni me vaj mente
Trajtim për largimin e mykut të duarve dhe këmbëve:
- Futini këmbët në një enë ku hidhni 1 litër ujë, 3 lugë gjelle uthull molle ose uthull hudhre, 1 lugë supe kripë. Mbani këmbët 15-20 minuta. Shpëlani këmbët ose duart me çajin antimyk, pasi i thani vendosni disa pika propolis me rigon dhe pasi thahen vendosni kremin antimyk. Këto veprime bëhen në mbrëmje. Këmbët ose duart lihen kështu tërë natën. Në mëngjes bëhet vetëm çaji, propolisi dhe kremi.
Në rubrikën “Bima dhe Shëndeti” me specialistin e bimëve mjekësore Ylli Merja në vijim të bisedës për infeksionet mykotike në duar dhe këmbë, u ndalëm dhe tek era e keqe e këmbëve, nga se shkaktohet ajo dhe si mund t’a largojmë në kushtet e shtëpisë.
"Zakonisht personat që vuajnë nga myku kanë dhe problemin me erën e këmbëve. Por, ka dhe persona që i rrinë këmbët gjithnjë të djersitura apo që kanë një djersitje të përgjithshme trupore e cila shoqërohet me një erë pak të rëndë. Kjo erë e rëndë nënkupton toksina në trupin e tyre të palarguara” thekson Merja.
Për të pastruar organizmin, çaji me kandimer është i mrekullueshëm. Ndërsa në kushte shtëpie mund të marrim një degë të bimës inula helenika, dy degëza rozmarine dhe 1 lugë gjelle rigon. Përgatisim një çaj, të cilin edhe e pijmë rreth 2 gota në ditë, por edhe shpëlajmë këmbët dhe duart ose pjesën e sqetullave ku depozitohet më shumë djersë dhe aromë e rëndë.
“Personat që kanë një djersë të fortë në aromë duhet të konsumojnë sa më shumë ujë dhe të përpiqen që të bëjnë sa më shumë detokse me bimë që kanë antiosidantë për të larguar toksinat nga trupi dhe në këtë mënyrë gradualisht do të largohet dhe era e pakëndshme. Ndërsa erën e rëndë të këmbëve e largojmë dhe duke bërë larje të herë pas hershme me sodë buke, me uthull molle dhe me kripë. Gjithashtu shumë efikase janë dhe bimët aromatike që kanë vajra esenciale si rozmarina, trumza, rigoni” rekomandon Ylli Merja.
