Pavarësisht goditjes që mori ekonomia e vendit nga pandemia COVID-19, e cila shkaktoi rënie të ardhurave si për buxhetin e shtetit ashtu edhe për familjet shqiptar, çmimet e apartamenteve vijojnë të rriten me ritme të shpejta. Sipas të dhënave të Bankës së Shqipërisë në vitin 2020 çmimet e shtëpive u rritën mbi 11% krahasuar me vitin 2019.
Shtrenjtimi i banesave është më i dukshëm nga viti 2013 deri më tani, ku banka raporton se rritja është me 48.6%, duke e bërë thuajse të pamundur blerjen e një prone pa kredi. Rreth 60% e pronave për banim dhe e atyre për përdorim tregtar të shitura janë blerë me hua bankare. Rritja e çmimeve nuk është prezente vetëm në kryeqytet, por edhe në zonat bregdetare vlera e pronave ishte dyfish më e lartë se në 2019.
“Për zonat bregdetare, çmimet e pronave të shitura gjatë gjysmës së dytë të vitit ishin rreth dy herë më të larta në krahasim me çmimet e pronave të shitura gjatë gjashtëmujorit të parë të vitit, ndërsa çmimet në zonat e tjera2 shfaqën ndryshime thuajse të papërfillshme”, thuhet në vrojtim.
Çmimet e larta duket se kanë ndikuar edhe tek ulja e shitjeve me rreth 39%, ndërsa apartamentet janë blerë më shumë nga shtetas që nuk jetojnë në Shqipëri. Sipas vrojtimit 18% e subjekteve të pyetura presin që çmimet do të vijojnë të rriten.
Shkak për këtë shtrenjtim sipas ekspertëve është mungesa e pronave pranë qendrës dhe ato që kanë mbetur janë të kushtueshme, është rritur cilësia e ndërtimeve. Ndikim kanë edhe taksat e pushtetit vendor por edhe zgjatja në kohë e marrjes së lejes së ndërtimit. Zonat më të kushtueshme të Tiranës mbeten ish-blloku, unaza dhe pjesa e qendrës, ku 1 metër katror kapërcen në 3300 euro.
//ReportTv.al
