Në datën 15 shkurt pritet të rinis puna në Institutin e Policisë Shkencore, e pezulluar që prej 17 janarit për shkak të ndryshimeve të ambienteve nga Garda e Republikës tek godina e ish-Policisë Ushtarake në Sauk.
Burime nga institucioni i thanë Report Tv se pjesa më e madhe e pajisjeve dhe logjistikës tashmë janë zhvendosur në ambientet e reja, ndërsa pritet që në ditët e mbetura të përmbyllet procesi i plotë.
Transferim në ambientet e reja bëhet edhe për të gjitha provat e bartura ndër vite në këtë institut. Përgjatë kësaj periudhe pezullimi të punës, çështjet në hetim të Prokurorisë së Tiranës, rretheve dhe të SPAK që janë dashur ekspertiza nuk janë kryer, por janë mbajtur të arkivuara pranë institucioneve përkatëse, përveç rasteve urgjente me natyrë të rëndë kriminale.
Në momentin e rifillimit të punës, të gjitha provat do të dërgohen në ambientet e reja të IPSH për t'u analizuar.
//ReportTv.al