Në orët e para të mëngjesit të sotëm, një shpërthim me lëndë plasëse ka tronditur banorët e një pallati në Lushnje. Policia bën me dije se rreth orës 02:35, në lagjen “Gafurr Muço”, në katin e parë të një pallati parafabrikatë, ka shpërthyer një sasi e vogël lënde plasëse në afërsi të derës së jashtme të banesës së shtetasit Besnik Çoku. Për pasojë është dëmtuar dera e kësaj banese dhe e banesës përballë saj. Në banesë jetonin tetë persona midis tyre dhe fëmijë.
"Sot rreth orës 02:35, në lagjen “Gafurr Muço”, Lushnjë, në katin e parë të një pallati parafabrikatë, ka shpërthyer një sasi e vogël lënde plasëse në afërsi të derës së jashtme të banesës së shtetasit B. Ç. Si pasojë e shpërthimit është dëmtuar dera e kësaj banese dhe e banesës përballë saj, në pronësi të shtetasit L. B. Grupi hetimor nën drejtimin e Prokurorisë Lushnjë po vijon punën për zbardhjen e ngjarjes, identifikimin dhe kapjen e autorëve", ka njoftuar policia.
Në një prononcim për mediat vëllai i kryefamiljarit të shtëpisë ku u vendos tritoli, Jetmir Çoku shprehet se janë të frikësuar dhe se s'kanë probleme dhe ndoshta autorët e ngjarjes kane gabuar shënjestër.
"Nuk dimë asgjë, s'kemi konflikt me asnjë! Mund të kenë ngatërruar shënjestër', shprehet Jetmir Çoku.
K.T.//ReportTv.al
