Një 36 vjeçari në Shkodër i ka dështuar tentativa për të vjedhur paratë në dyqanin e një kompanie telefonike në Shkodër. Autori ka hyrë në dyqan duke tentuar të vjedhë paratë me dhunë por ai është kapur brenda në dyqan, nga shërbimet e Patrullës së Përgjithshme dhe të Policisë Rrugore.
"Mesditën e sotme, punonjësit e Policisë të planëzuara me shërbim në terren, për goditjen e paligjshmërive dhe rritjen e parametrave të sigurisë, kanë konstatuar një shtetas që kishte hyrë në dyqanin e një kompanie telefonike dhe po tentonte t’i merrte me dhunë një shumë parash, punonjëses së dyqanit. Menjëherë kanë ndërhyrë shërbimet e Patrullës së Përgjithshme dhe shërbimet e Policisë Rrugore që ishin me shërbim në këtë zonë, për të parandaluar vjedhjen dhe për të vënë në pranga autorin. Si rezultat i veprimeve të shpejta dhe profesionale është kapur në flagrancë dhe është vënë në pranga autori i vjedhjes, shtetasi:
B. K., 36 vjeç, banues në Shkodër", njofton policia.
Gjithashtu u sekuestruan 32 500 lekë të rinj që ky shtetas tentoi t’i merrte në dyqan.
Materialet procedurale do ti kalojnë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
B.K/ReportTv.al