Myrto Uzuni nuk është më ai i sezonit të shkuar, kur me 23 gola në La Liga 2 ia doli të ngjiste Granadan në elitën e futbollit në Spanjë dhe të bëhej lojtari më i mirë i ligës. Duke lënë mënjanë nivelin e elitës së Spanjës, krahasuar me atë të ligës së dytë, ndërrimi i pozicionit ka bërë që beratasi të shënojë vetëm pesë gola këtë edicion.
Sipas "Ideal" në Spanjë, shqiptari e ka pasur të vështirë të përshtatej me skemën e trajnerit Aleksandër Medina. Tekniku uruguajan luan me dy anësor dhe një sulmues "pykë", duke zgjedhur Boye si referencë, me beratasin që e ka të vështirë të jetë anësor.
Sezonin e shkuar Uzuni ishte pas sulmuesit si "i dytë", duke përfituar nga teknika dhe shpejtësia e tij për të shënuar dhe nxjerrë shokët e ekipit te goli. 28-vjeçari ka kontratë me Granadan deri në verën e 2026 dhe nëse nuk ia del të shënojë në muajt e ardhshëm rrezikon mos marrë një ftesë nga Sylvinho, me Kombëtaren kuqezi që do jetë pjesë e grupit B në Euro 2024 në Gjermani.
S.DH/ReportTv.al