Në një finale që s’do harrohet lehtë, Flamurtari në basketboll për vajza është shpallur kampion në Kupën e Shqipërisë, duke mposhtur Partizanin 80-79 me pikë.
Në pallatin e sportit të Vlorës, që rrallëherë ishte mbushur me kaq shumë tifozë, duke krijuar një atmosferë të jashtëzakonshme, fituesi u përcaktua në koshin e fundit. Madje në 30 sekondat e fundit fillimisht realizoi Partizani duke kaluar në avantazh 78-79, por në momentet e fundit kapitenia vlonjate bëri diferencën.
“Ishte një finale nga më emocionueset që kam luajtur. Mendoj se publiku ishte i madh në numër dhe entuziazmi i tyre u përcoll,”-u shpreh Tea Memushi, kapitene e Flamurtarit.
Ish-trajnerja e Flamurtarit të vajzave për shumë vite, Elona Hasanaj, tani në rolin e drejtueses, tha se finalja kundër Partizanit dhuroi emocione të papërsëritshme.
“Sot ka qenë një ndeshje e jashtëzakonshme, me jashtëzakonisht rivalitet. Jashtëzakonisht e bukur që u nda në sekondat e fundit. Falenderoj ekipin e vajzave dhe trajnerin,”-tha Elona Hasanaj, drejtoreshë e Flamurtarit.
“Flamurtari di të zgjidhë situatat në momente të caktuar dhe kyçe. Urime Flamurtarit, por urime edhe Partizanit pavarësisht se gaboi në momentin e fundit dhe i iku Kupa,”-deklaroi Avni Ponari, president i FSHB.
Kupa e Shqipërisë në basketboll për vajza u zhvillua për dy ditë në Vlorë, teksa pjesëmarrëse përveç finalistëve ishte edhe Tirana me Vllazninë.
Ne.k.//ReportTv.al
