SAPUNI E BARDHË (Ëmbëlsirë e traditës Çame)
Përbërësit:
- ½ litër ujë
- 250 gr niseshte
- 300 gr sheqer
- 250 gr gjalpë
- 1 fk vaj ulliri
- 250 gr bajame të qëruara
Përgatitja:
Në fillim marrim bajamet dhe i pastrojmë nga lëvozhga duke u hedhur sipër ujë të nxehtë. I heqim lëkurën me kujdes dhe i lemë mënjëanë. I grijmë në copa të vogla dhe më pas i skuqim me pak gjalpë.
Në një tenxhere hedhim gjysmën e sasisë së ujit dhe sheqerin. I trazojmë mirë duke i venë në zjarr për të marë valë. Ndërkohë në një enë tjetër tresim niseshten me pjesën tjetër të ujit. E përziejmë ngadalë me lugë druri derisa të tretet plotësisht niseshteja pa krijuar kokrriza. Sapo tenxherja me ujin dhe sheqerin të marrë valë hedhim niseshten e tretur duke u kujdesur që të ulim temperaturën e zjarrit. E trazojmë shpejt në mënyrë që të mos cignoset në fund. Kur fillon e trashet niseshteja shtojmë vajin dhe gjalpin e tretur. E trazojmë pa ndaluar për gati 10 minuta.
Sapunija është gati kur të jetë formuar një masë e tejdukshme që nuk ngjitet tek luga dhe që shkëputet lehtësisht nga anët e tenxheres. Shtojmë bajamet dhe e largojmë tenxheren nga zjarri. Lagim një lugë në ujë të ftohtë dhe pa u mpiksur ëmbëlsira e servirim lugë - lugë duke i dhënë formë sipas dëshirës.
