Kufjet janë një ndër aksesorët më të përhapura që përdoren jo vetëm nga të rriturit por edhe nga fëmijët. Sipas një sondazhi të bërë në SHBA në spitalin e Fëmijëve CSMott të Universitetit të Miçiganit, prindërit e fëmijëve nga mosha 5-12 vjeç janë shprehur se këta të fundit gjatë një dite i përdorin kufjet një deri në dy orë në ditë.
Fëmijët i përdorin më shumë këto aksesorë të dëmshëm në shtëpi, në shkollë dhe në makinë, ndërsa më pak se 10% e prindërve thonë se fëmijët e tyre i përdorin ato në autobus, jashtë ose në shtrat. Edhe pse janë të dëmshme për dëgjimin këta prindër raportojnë se kufjet ndihmojnë fëmijën e tyre që të argëtohen.
Por fatkeqësisht sipas ekspertëve përdorimi i kufjeve me orë të tejzgjatura mund të çojë në probleme fatale për shëndetin si mund të ndikojë në gjumin e fëmijëve, rënien nga mësimet, rrit nivelin e stresit, presionin e gjakut si dhe më e rëndësishmja humbja e dëgjimit.
Sidomos tek fëmijët e vegjël, të cilët janë më të ekspozuar nga dëmtimet e mundshme dhe nga ekspozimi ndaj zhurmës sepse sistemi i tyre i dëgjimit është ende në zhvillim.
Prandaj për të reduktuar këtë problem studiuesit këshillojnë që:
- Prindërit duhet t'u blejnë fëmijëve kufje që përdoren për ndalimin e zhurmave ose me volum shumë të ulët
- Prindërit nuk duhet t’i lejojnë fëmijët që t’i përdorin për një kohë shumë të gjatë kufjet
- Prindërit duhet të jenë vigjilentë për shenja si humbja e dëgjimit për shkak të përdorimit të kufjeve dhe të drejtohen tek mjekët specialistë.
SI.E./ReportTv.al