Greqia ka shënuar rekord viktimash në këtë valë të re pandemie. Mësohet se 116 qytetarë kanë humbur jetën si pasojë e koronavirusit në 24 orët e fundit.
Sipas raportimeve, 95,4 për qind e viktimave kanë pasur sëmundje shoqëruese. Që prej fillimit të pandemisë në vend janë regjistruar 18,716 të vdekur.
Sakaq, 4,943 qytetarë kanë rezultuar pozitivë me koronavirus, duke e çuar numrin e përgjithshëm të tyre në 971,148 që prej fillimit të pandemisë.
Nga sot Greqia ofron teste falas për Covid-19, për të gjithë qytetarët grek. Testet falas do të jenë në disponim për të gjithë në farmacitë e vendit.
Çdo qytetar ka të drejtë të marrë dy teste falas, në mënyrë që njërin ta kryejë para festave, ndërsa tjetrin pasi të kthehen në shkollë e punë pas pushimeve.
Qëllimi është të identifikohet çdo i infektuar asimptomatik dhe të ndalet transmetimi por edhe të garantohen pushime sa më të sigurta për të gjithë.
Greqia ka konfirmuar deri më sot 3 raste të variantit të ri 'Omicron', i cili po shqetëson mbarë botën.
