Me rastin e të Premtes së Zezë ose e njohur ndryshe si ‘Black Friday’, punonjësit e gjigantit të tregtisë elektronike 'Amazon' kanë planifikuar një sërë protestash me synimin për të ngadalësuar blerjet dhe shpërndarjen e produkteve.
Në Gjermani, tregu i dytë më i madh i Amazon për nga shitjet në vitin 2022, punëtorët në pesë qendra klasifikimi në Bad Hersfeld, Dortmund, Koblenz, Leipzig dhe Rheinberg hynë në një grevë 24-orëshe duke filluar mesnatën e së enjtes për të kërkuar një marrëveshje kolektive të pagave.
Një zëdhënës i kompanisë në Gjermani u përgjigj se punëtorët marrin paga të mira, me një pagë fillestare prej më shumë se 14 euro (15,27 dollarë) në orë dhe përfitime shtesë, duke shtuar se dërgesat e porosive të së Premtes së Zezë do të jenë gati në kohë reale.
Më shumë se 1000 punëtorë në magazinë e Amazon në Coventry, Angli, do të protestojnë sot (24 Nëntor) si pjesë e mosmarrëveshjes së pagave, sipas sindikatës GMB. Sindikalistët po organizojnë gjithashtu një demonstratë në selinë e Amazon në Londër, raporton La Repubblica.
Në Francë, aktivistët e Attac po organizojnë një protestë me ngjitëse në dollapë, duke bllokuar punonjësit e dërgesave dhe klientët që synojnë t'i hapin ato.
Protesta po zhvillohen edhe në Itali, me CGIL që thirri një grevë në magazinë Castel San Giovanni, në provincën e Piacenza. Ndërsa sindikata spanjolle CCOO u bëri thirrje punëtorëve të magazinës dhe dërgesave të Amazon që të organizojnë një grevë njëorëshe për ndërrim gjatë "Cyber Monday", ditën e fundit të periudhës dhjetë-ditore të shitjeve të Amazon.
S.S/ReportTv.al