Mazhoranca pret të gjejë gjuhën e përbashkët me opozitën parlamentare, duke dalë në një draft të vetëm për listat e hapura, e më tej t’i hapë rrugën PD-së dhe LSI-së për të shqyrtuar në Këshillin Politik propozimet që opozita jashtë Kuvendit solli në moment të fundit, të dielën mbrëma.
Teksa e marta do të jetë intensive në Komisionin e Ligjeve ku draftet e PS dhe opozitës parlamentare do të kalojnë nen për nen, e mërkura e 30 shtatorit, që është dhe dita e fundit për të çuar në seancën e 1 tetorit projektligjin për votim, do t’i dedikohet draftit të opozitës për lista 100% të hapura dhe ruajtjen e formulës së njëjtë të koalicioneve parazgjedhore.
Nuk dihet akoma nëse do të gjendet dakordësia dhe kohë, që brenda 30 shtatorit, drafti final të përfshijë edhe propozime nga PD. Mbledhjen e Këshillit Politik, Rudina Hajdari e kërkoi të martën në mesditë, por refuzimi publik erdhi nga Gjiknuri.
“Sa i përket Këshillit Politik, ne mbrëmë vonë morëm draftin e PD-së. Komisioni i Ligjeve ka filluar shqyrtimin, dhe nesër do vazhdojmë me komisionin e ligjeve për të përafruar disa qëndrime dhe natyrshëm më vonë do t’i japim përgjigje dhe PD se kur do të thërrasim Këshillin Politik e më pas të fillojmë dialogun”, tha Gjiknuri.
Këtë qëndrim, e komplimentoi ambasadorja SHBA-së Yuri Kim. Ajo është shprehur e kënaqur që opozita jashtë Kuvendit ka marrë përgjegjësitë e veta.
“Jam e kënaqur që opozita jashtë kuvendit ka marrë përgjegjësitë e saj për të vazhduar përfaqësimin e popullit dhe për të qene e angazhuar. Është tejet e rëndësishme që opozita të ngelet e angazhuar dhe të gjithë paratitë të sjellin propozime që janë reale.Sot opozita ka bërë një propozim, jam e kënaqur që kam dëgjuar gjithashtu PS që ka thënë se do ta marrë në konsideratë këtë propozim. 5 qershori ishte gjithëpërfshirës dhe transparent dhe çdo palë që e ka nënshkruar duhet t’i qëndrojë fjalës së dhënë. Firma ime nuk është mbi atë letër. Ata që e firmosën kanë përgjegjësinë për të zbatuar 5 qershorin. 5 qershori të nderohet e nëse palët bien dakord përtej 5 qershorit, ne do t’i mbështesim. Po le të presim çfarë do të ndodhë", u shpreh Kim.
Javën e kaluar, Konferenca e Kryetarëve i caktoi politikës axhendën për t’i dhënë formë në Kodin Zgjedhor ndryshimeve kushtetuese të miratuara më 30 korrik, duke i lënë afat të fundit 1 tetorin.
//ReportTv.al