Ministria e Brendshme ka hedhur për konsultim publik një draft me disa ndryshime thelbësore përsa i përket kompetencave të prefekturave në Shqipëri. Ky draft i cili i mundëson prefektit të një qarku të propozojë edhe shkarkimin e kryetarit të një bashkie përkatëse, ka ngjallur debate të shumta.
Për të diskutuar në lidhje me këtë draft të propozuar nga ministria e Brendshme, i ftuar në “Sot Live në Shqipëri” me Nertil Agalliun në Report Tv, ishte drejtori ekzekutiv i Institutit të Bashkive, Agron Haxhimali.
I pyetur se si i gjykon ndryshimet që përmban ky draft, në lidhje me prefekturat, Haxhimali i cilësoi të panevojshme dhe theksoi se kjo bëhet për shuar “etjen” e prefektëve për pushtet.
“Ndryshime të panevojshme, propozime të panevojshme, konsum mediatik, politik i panevojshëm fare.
Prefekti sot në mënyrën se si është organizuar Republika e Shqipërisë, në nivelet e pushtetit, ato përfaqësojnë qeverisjen vendore në një rajon të caktuar.
Historikisht ka qënë e debatueshme roli i prefektëve sepse gjithmonë kanë dashur pushtet.”-deklaroi Haxhimali.
Ndër të tjera, Haxhimali tha se nuk është e drejtë që një institucion i parashikuar në Kushtetutë të diktohet në atë lloj mase nga prefektura.
“Kjo prevalon mbi ligjet vendore. Ai është i zgjedhur si kryetar i bashkisë dhe një të zgjedhur me mandat nga qytetarët, nuk mund ta shkarkojë një institucion si prefekti i emëruar, se për ta shkarkuar nuk e shkarkon dot se ka rregulla të tjera që i ka ligji dhe Kushtetuta se kush e shkarkon.’-tha ai.
“Ne nuk e njohim bashkëpunimin e qeverisë me shumë nivele, secili do kontrollin e vet, territorin e vet dhe këtë po kërkojnë prefektët.”- theksoi Haxhimali.
Një ndër ndryshimet e tjera i cili bën pjesë në draftin e propozuar është edhe raportimi i drejtorit të policisë vendore tek prefekti i qarkut përkatës, në çdo 10 ditë. Haxhimali tha se është dicka e tepruar dhe se ka forma të tjera të raportimit të policisë me aq sa është e nevojshme në organet vendore.
“Është një tepri e madhe. Ka forma të koordimimit, të informimit për pjesën që policisë i është lejuar të raportojë.”-u shpreh Haxhimali.
K.M//ReportTv.al“A ka prefektura pontecialin që t’i bëjë të gjitha këto. Taksapaguesit shqiptarë do të shtojnë një administratë tjetër, me ekspertë në prefekturë, s’janë të nevojshme fare.
Asnjë burokraci nuk i shërben një vendi kaq të vogël.”-nënvizoi ai.