Përplasjet ushtarake mes Azerbajxhanit dhe Armenisë për vënien nën kontroll të rajonit të kontestuar Nagorno Karabakh, vazhdojnë ende, qindra njerëz kanë humbur jetën si pasojë e konfliktit, mijëra shtëpi janë shkatërruar dhe bombardimet me raketa vazhdojnë ende. Në Barda, një nga qytetet më të goditura ditët e fundit, familjarët dhe miqtë i dhanë lamtumirën e fundit ushtarëve të vrarë, megjithëse ende nuk ka një shifër zyrtare për numrin e ushtarëve azere të vrarë në luftimet me Armeninë.
Zyrtarët e Azerbajxhanit akuzojnë forcat armene se vijojnë të sulmojnë shumë nga fshatrat dhe qytetet, duke lënduar civilët e njëjta akuzë ngrihet edhe nga pala armene.
Së fundmi të dy vendet kanë konfirmuar se ministrat e tyre të jashtëm do të shkojnë për bisedime në Moskë, e cila ka kërkuar armëpushim mes palëve. Lajmin e dha zëdhënësja e ministrisë së jashtme Ruse Maria Zakharova.
Përpjekjet e Moskës , Francës, Gjermanisë dhe SHBA kanë hasur vështirësi jo vetëm nga palët e përfshira drejtpërdrejt në konflikt por edhe sepse Turqia mbështet fuqishëm Azerbajxhanin.
Autoritetet armene akuzojnë Azerbajxhanin për bombardimin e asaj që njihet si 'Katedralja e Shenjtë e Shpëtimtarit', sulme gjatë të cilit u lënduan edhe dy gazetarë. Sulmi u konsiderua nga Jerevani zyrtar si krim lufte.
Azerbajxhani dhe Armenia zhvilluan një luftë të përgjakshme për vënien nën kontroll të Nagorno-Karabakut në fillimin e viteve 1990. Mijëra persona humbën jetën në të dyja palët, dhe me mijëra persona u detyruan të zhvendosen nga banimet e tyre.
//ReportTv.al