Kreu i Partisë së Lirisë, Ilir Meta i ka bërë thirrje qeverisë të dëmshpërblejë qytetarët që janë prekur nga përmbytjet. Meta thotë se drejtësia duhet të veprojë për drejtuesit e KESH pasi quan ata përgjegjës për krijimin e kësaj situate.
“Kemi të bëjmë me një fatkeqësi natyrore. Qeveria të dëmshpërblejë qytetarët dhe drejtësia të veprojë ndaj drejtuesve të sistemit energjetik për të gjitha aktet e rënda si korruptive që çuan në këtë situatë, ashtu edhe për moslajmërimin e autoriteteve vendore qytetarëve për t’u mbrojtur nga përmbytja. Në një vend ku llogaridhënia është zero për shkak të kapjes së shtetit dhe paralizimit të të gjitha institucioneve e vetmja rrugë për vendosjen e llogaridhënies është ajo e referendumit dhe besoj që bashke me PD dhe të gjithë forcat e tjera opozitare do të bëjmë të mundur që Shqipëria të ketë jo një por disa referendume që do të vendosin shtetin e së drejtës që u përgjigjet qytetarëve dhe jo që i shtyp ato”, tha Meta.
Lajmi kryesor:
Meta: Përmbytja erdhi nga korrupsioni, hidrovoret në Shkodër s’ishin në punë për shkak të mungesës së energjisë! Qeveria të dëmshpërblejë qytetarët
SI.E.//ReportTv.al