Të paktën 31 persona kanë humbur jetën dhe 500 mijë të tjerë janë detyruar të largohen nga shtëpitë e tyre në Somali, e cila është goditur nga përmbytjet për shkak të shirave të pandërprerë, njoftoi të dielën ministri i qeverisë së vendit të Afrikës Lindore.
Autoritetet kanë konfirmuar vdekjen e 31 personave, “por ka mundësi që numri i të vdekurve të jetë më i lartë”, tha Dowd Awais, ministri i informacionit. Ndërsa “gjysmë milion njerëz janë larguar nga shtëpitë e tyre për shkak të përmbytjeve,” shtoi ai, duke paralajmëruar se 1.2 milion qytetarë të tjerë janë në rrezik.
Somalia është goditur që nga fillimi i nëntorit nga shirat e pandërprerë që i atribuohen pjesërisht fenomenit El Nino, duke rezultuar në përmbytje që kanë përfshirë shtëpitë dhe kulturat bujqësore. Shkatërrimi më i madh u regjistrua në rajonet e Gendo (jug) dhe Hiran (qendër), ku lumi Sabelle vërshoi, duke përmbytur rrugët dhe duke shkatërruar shtëpi në qytetin e Balanduene.
El Nino aktualisht po intensifikon reshjet e sezonit me shi në Bririn e Afrikës, me pasojat që prekin edhe Etiopinë (të paktën 20 të vdekur) dhe Keninë (të paktën 15 të vdekur).
Somalia, ku shumica e 17 milionë njerëzve të saj punojnë në blegtori dhe bujqësi, është ndër vendet më të cenueshme ndaj ndryshimeve klimatike dhe po goditet nga ngjarjet ekstreme të motit që po rriten në frekuencë dhe intensitet. Zyra e OKB-së për Koordinimin e Çështjeve Humanitare (OCHA) theksoi javën e kaluar se vendi po përballej me përmbytje “një herë në shekull”, raporton agjencia e lajmeve amerikane newsbulletin.
Sipas OCHA, situata është përkeqësuar nga ndikimi i kombinuar i El Niño dhe “Dipolit Indian”, divergjenca e temperaturave të sipërfaqes së detit në pjesët perëndimore dhe lindore të këtij oqeani.
Fenomeni El Niño, i cili përgjithësisht shoqërohet me rritje të temperaturave, thatësira në disa pjesë të botës dhe shira të dendur në të tjera vende, pritet të vazhdojë të paktën deri në prill, paralajmëroi të martën Organizata Botërore Meteorologjike (WMO).
Ky fenomen meteorologjik ka shkaktuar në mënyrë të përsëritur shkatërrim të gjerë në Afrikën Lindore. Nga tetori 1997 deri në janar 1998, përmbytjet masive të shkaktuara nga shirat e rrëmbyeshëm morën jetën e mbi 6 mijë njerëzve në pesë vende të rajonit.
Nga tetori deri në nëntor 2006, përmbytjet e shkaktuara nga reshjet e pazakonta për sezonin në Somali kishin vrarë më shumë se 140 njerëz për shkak të rritjes së ujërave, epidemisë së malaries dhe krokodilëve. Në fund të vitit 2019, të paktën 265 njerëz humbën jetën dhe dhjetëra mijëra të tjerë u zhvendosën gjatë dy muajve të shirave të pandërprerë në vendet e rajonit.
S.S/ReportTv.al