Një tjetër vendgrumbullim i paligjshëm mbetjesh është përfshirë nga flakët këtë mbrëmje në Elbasan. Mësohet se vendgrumbullimi i paligjshëm i mbetjeve ndodhet në zonën e ish-Kombinatit Metalurgjik. Report Tv mëson se zjarrfikësja ndodhet në vendngjarje dhe po punon për të shuar flakët, ndërsa dyshohet për zjarrvënie të qëllimshme.
Kjo nuk është hera e parë që mbetjet digjen në natyrë, duke shkaktuar kështu plagë mjedisore kancerogjene edhe pse ka impiante për përpunimin e tyre. Kujtojmë rastin e fundit në Fier, ku mbetjet urbane u dogjën dhe zona mbeti nën pushtetin e tymit.
Si pasojë e flakëve dhe tymit të ngritur në ajër, shtëpi e biznese të shumta në afërsi të vendit të quajtur Mbrostar, u mbuluan nga tymi, gjë që ka shkaktuar jo pak shqetësim tek banorët.
Përgjatë sezonit veror, ngjarje të tjera u regjistruan edhe në Kavajë, jo shumë larg vijës bregdetare, por edhe në Vlorë dhe në vendgrumbullimin e mbetjeve në Laç.
Nga ana e kryeministrit Edi Rama ky fenomen është konsideruar si “ndotje e rëndë mjedisore”, ku në dy takime që ka mbajtur kohët e fundit me kryebashkiakët e vendit u ka kërkuar zgjidhjen e menjëhershme të çështjes së mbetjeve.
Kreu i qeverisë iu la edhe afat që fenomene të tilla të mos ndodhin më. Rama ka këmbëngulur se asnjë bashki nuk duhet t’i shmanget përgjegjësisë dhe mbetjet të shkojnë në inceneratorët e ngritur.
//ReportTv.al
