Pas goditjes së mafias ‘Cosa Nostra’ lideri i së cilës u arrestua ditë më parë, policia italiane ditën e sotme ka arrestuar 56 persona në të gjithë vendin të akuzuar për lidhje me mafian italiane ‘Ndragheta’. Në total u sekuestruan 250 milionë euro pasuri që dyshohet se vinte nga aktiviteti kriminal. Akuzat që rëndojnë ndaj të arrestuarve, janë zhvatje, rrëmbim, trafik armësh, korrupsion dhe mashtrim.
Autoritetet italiane teksa u shprehën për operacionin, thanë se shuma e madhe e aseteve të sekuestruara konfirmojnë fuqinë ekonomike të klanit Ndragheta që u godit ditën e sotme.
Operacioni i policisë vjen vetëm një javë pasi një nga të arratisurit më të kërkuar në Itali, bosi famëkeq i mafias siciliane Matteo Messina Denaro, u arrestua në Palermo.
Klani 'Ndrangheta i ka rrënjët në rajonin jugor të Kalabrisë, por tani është përhapur në të gjithë gadishullin dhe në pjesën tjetër të kontinentit. Kjo organizatë është e përfshirë në kontrabandën e drogës në Evropë, duke mbajtur lidhje të forta me kartelet e Amerikës së Jugut.
B.V//ReportTv.al