Papa Françesku tha të enjten se furnizimi i Ukrainës me armë nga kombe aleate është moralisht legjitim pasi e ndihmojnë vendin që të mbrohet nga agresioni rus.
Duke folur me gazetarët në bordin e një aeroplani ndërsa po kthehej nga një udhëtim tre-ditor në Kazakistan, Papa Françesku i kërkoi Kievit të ishte i hapur ndaj dialogut eventual, edhe pse e di se ishte e vështirë për palën ukrainase.
Në një konferencë shtypi 45-minutëshe, një gazetar e pyeti Papën nëse ishte moralisht e drejtë që vendet të dërgonin armë në Ukrainë.
“Ky është një vendim politik, i cili mund të jetë moral, moralisht i pranueshëm, nëse bëhet në kushte morale”, tha Françesku.
Ai shpjegoi parimet e "Luftës së Drejtë" të Kishës Katolike Romake, të cilat lejojnë përdorimin proporcional të armëve vdekjeprurëse për vetëmbrojtje kundër një kombi agresor.
"Vetëmbrojtja nuk është vetëm e ligjshme, por edhe shprehje e dashurisë për atdheun. Ai që nuk mbron veten, që nuk mbron diçka, nuk e do atë. Ata që mbrojnë (diçka) e duan atë", tha ai.
Duke shpjeguar ndryshimin midis asaj se kur është morale apo imorale të furnizosh armë në një vend tjetër, Françesku tha:
"Mund të jetë imorale nëse qëllimi është të provokojë më shumë luftë, ose të shesë armë. Motivi është ai që në një pjesë të madhe e cilëson moralin e këtij veprimi," tha ai.
Papa ishte në Kazakistan për të marrë pjesë në një kongres të udhëheqësve fetarë nga e gjithë bota, ku patriarku Kirill i Moskës – i cili mbështet luftën në e Rusisë dhe Putinin -, anuloi pjesëmarrjen.
D.GJ/ReportTv.al
