Teksa edhe pak ditë kanë mbetur nga ndërrimi i viteve, Orkestra e Harqeve e Qendrës Kulturore "Aleksandër Moisiu" në Durrës dha mbrëmjen e së enjtes koncertin festiv me pjesë nga kompozitorët shqiptarë dhe të huaj.
Premierë për këtë natë orkestrale ishte vepra e kompozitorit durrsak Moni Kuriçi "Suitë ballkanike", si dhe vepra e njohur "Serenade" e kompozitorit çek Josef Suk.
Publiku durrsak i cili pati mundësinë e hyrjes së lirë, tejmbushi sallën e Pallatit të Kulturës duke duartrokitur pas çdo pjese të luajtur.
Për dirigjentin Petrika Afezolli dhe kompozitorin Moni Kuriçi, pagesat e artistëve janë ende larg shpërblimit monetar, që aplikohet në qytetet e tjera të vendit, por ata gjetën rastin të bëjnë disa falenderime modeste në nisje të kësaj mbrëmje festive.
Në skenë u ngjit dhe mezzosoprano Olta Juba e cila ishte pjesë e programit dhe këndoi një pjesë nga opera “Karmen”, pjesë të cilën publiku e përshëndeti me duartrokitje të shumta.
Aktualisht Orkestra e Harqeve të Durrësit përbëhet nga 20 instrumentistë së bashku me dirigjentin e saj, të cilët paguhen nga buxheti i bashkisë, ndërsa pagesat e 4 instrumentistë të tjerë mbulohen nga sponsorët dhe bizneset.
M.Q.//ReportTv.al