“Kushtet që BE ka vendosur për Shqipërinë janë të qarta: zbatimi i reformës në drejtësi dhe vettingu; lufta kundër drogës dhe krimit; lufta kundër korrupsionit; reforma e administratës publike; dhe respektimi i të drejtave themelore të njeriut”, ka reaguar Basha.
Në profilin e tij në Facebook, kreu i opozitës ka nënvizuar se, mbështet pa asnjë kusht përpjekjet për përmbushjen e secilit prej këtyre kritereve.
“Ne mbështesim pa asnjë rezervë zhbllokimin e menjëhershëm të reformës në drejtësi dhe krijimin e KLP-së për t’i hapur rrugën krijimit të SPAK-ut dhe të Byrosë së Hetimit, si dhe zgjedhjes së prokurorit të përgjithshëm në mënyrë kushtetuese, pasi të ketë kaluar vettingun me tre të pestat e Kuvendit”, ka thënë më tej Basha.
Ai ka insistuar për heqjen e imunitetit të ish-ministrit të Brendshëm, Saimir Tahiri dhe hetimin e tij si çdo qytetar i thjeshtë për lidhjet me trafikun e drogës. “Mbështesim pa kushte edhe hetimin e të gjithë zyrtarëve të lidhur me krimin nga Vangjush Dako dhe Qazim Sejdini tek shefat e policisë. Mbështesim arrestimin dhe hetimin e grupeve kriminale nga Habilajt tek Balilajt”, ka vijuar Basha.
Ai ka shprehur “mbështetje pa asnjë rezervë” edhe sa i takon luftës kundër korrupsionit, sidomos hetimit të koncesioneve në shëndetësi, inceneratorë, PPP-të, etj.
“Ne mbështesim pa asnjë rezervë të drejtat e qyterarëve, liritë dhe pronën e tyre kundër ndërhyrjeve arbitrare. Ne do japim kontributin tonë në Kuvend dhe në institucione për këtë gjë. Por detyra jonë është të bëjmë opozitë, çfarë është rol themelor dhe i domosdoshëm për funksionimin e demokracisë, kufizimin e pushtetit dhe mirëqeverisjen e vendit. Shqipëria nuk duhet të ketë demokraci fasadë dhe nuk duhet të ketë partitë dhe tavolinat partiake mbi Kushtetutën dhe mbi institucionet”, ka shtuar Basha.
G.F. / Shqiptarja.com