Nga nesër nis viti i ri shkollor për nxënësit. Nëpërmjet një video-mesazhi, Ministrja e Arsimit dhe Sportit Evis Kushi u është drejtuar me një urim të gjithë nxënësve, duke theksuar se në të gjitha shkollat janë marrë masat që ky vit shkollor të jetë sa më i mbarë.
Kushi u bën thirrje nxënësve që t’i kushtojnë kujdes maksimal masave anti-Covid. Më herët Ministrja, ka njoftuar se nga klasa e parë deri më të 9-të, nxënësit do të përfitojnë libra shkollor falas.
"Siguria dhe shëndeti juaj është elementi më i rëndësishëm për të gjithë ne, prandaj lutja ime për ju është që t’i respektoni të gjitha masat në shkollë", tha ministrja.
Nga dita e nesërme, me fillimin e mësimit të gjitha shkollat janë të detyruara të respektojnë protokollin për masat anti-COVID.
Vaksinimi për arsimtarët është i detyrueshëm, ndërsa për ata që nuk e bëjnë, do të duhet të paraqesin test COVID çdo javë për të treguar se nuk janë të infektuar nga virusi.
