NEPAL- Një avion me 72 persona në bord është rrëzuar në aeroportin Pokhara në Nepalin qendror, mësohet se kanë humbur jetën 68 udhëtarë. Një qytetar ka filmuar momentin e fundit të avionit, ku shihet se bën një kthesë dhe më pas shpërthen.
Referuar asaj që raportojnë mediat ndërkombëtare, në bord ishin 68 pasagjerë dhe katër anëtarë të ekuipazhit. Mes pasagjerëve kishte shumë të huaj, 5 indianë, 4 rusë, një irlandez, 2 koreano-jugor, 1 francez, 1 argjentinas, 1 australian. Televizioni shtetëror raportoi se disa trupa ishin nxjerrë nga vendi i përplasjes, teksa mbeten të paqarta shkaqet.
Avioni u rrëzua midis aeroportit të vjetër dhe Aeroportit Ndërkombëtar Pokhara, në rrethin Kaski, rreth 200 km në veriperëndim të Katmandu. Kryeministri Pushpa Kamal Dahal thirri një mbledhje urgjente të kabinetit të tij dhe u kërkoi agjencive shtetërore të punojnë në operacionet e shpëtimit.
Vitin e kaluar një avion me 22 persona në bord u rrëzua në malet e Nepalit. Një tjetër aksident daton në vitin 2018, në atë rast humbën jetën 49 persona.
Momente nga operacioni i kërkim-shpëtimit
Është thelluar bilanci i tragjedisë pas rrëzimit të avionit me 72 persona në bord pranë një aeroporti në Nepal.
Sipas CNN, deri më tani është konfirmuar se kanë humbur jetën 64 persona. Në momentin e ngjarjes në avion ndodheshin 72 persona me të cilëve 4 anëtarë të ekuipazhit dhe 68 pasagjerë.
Po punohet ende për të gjetur edhe 8 pasagjerët e fundit, ndërkohë që shpresat që ata të jenë gjallë po shuhen.
Në mesin e viktimave është edhe një foshnje, sipas autoritetit civil të Nepalit.
