VIDEO
“Djemtë tanë të batalionit të dytë të xhenios, janë të kudondodhur. Marr përditë mesazhe falenderimi nga banorë, nga të gjitha zonat e Shqipërisë, aty ku Forcat e Armatosura kanë dhënë kontributin e tyre në ndërtimin e urave apo në zgjerimin dhe sistemimin e rrugëve, në ato zona ku nuk është vënë dorë kurrë, apo ku mundësitë e pushtetit vendor kanë shteruar. Bashkëpunimi me pushtetin vendor është një element i rëndësishëm i kontributit që FA mund të japin për komunitetin.
Ndaj është e nevojshme që strukturat vendore të bëjnë një skanim të plotë, të gjitha zonave, të cilat më së shumti izolohen gjatë muajve të dimrit, për t’i paraprirë problemeve që mund të shfaqen. Ky skanim do të na ndihmojë në koordinimin e veprimeve për t’ju gjendur pranë, në kohën e duhur të gjithë banorëve, kryesisht në zonat më të thella, atje ku nevojitet edhe ndërhyrja jonë, tanimë edhe në kushtet e administrimit të Emergjencave Civile nga FA”, tha ministrja gjtë inspektimit të urës tanimë të përfunduar.
Kryetari i grupit kuvendor socialist, njëherësh deputet i qarkut të Elbasanit, Taulant Balla vlerësoi reformën e ndërrmarrë nga ministrja e Mbrojtjes për reformën në drejtim të Emergjencave Civile apo Rezervave të Shtetit.
“Të gjithë kolegët e qeverisë janë në territor sepse ashtu siç jemi angazhuar para jush më 25 qershor që bashkëqeverisja me njerëzit nuk është thjeshtë një slogan, por është një vepër, edhe ndërtimi i kësaj ure sot nga forcat e ushtrisë tregon se ato po e ndryshojnë dita – ditës funksionin e tyre në shërbim të nevojave primare që kanë njerëzit.
Dua ta përshëndes Oltën për një reformë e cila ishte e domosdoshme dhe tani po konkretizohet. Kalimi i Emergjencave Civile, dhe i Rezervave të Shtetit në vartësi të Mbrojtjes është një prej reformave më të rëndësishme që në ditët e ftohta të dimrit dhe me shumë dëborë fshatrave të Librazhdit, fshatrave verilindore të Shqipërisë, FA do të kenë mundësinë e menjëhershme të ndihmojnë të gjitha familjet që do të kenë nevojë për t’u asistuar nga djemtë por edhe nga vajzat e palodhura të FA”, tha deputeti Balla.
Gjatë vizitës në qarkun e Elbasanit, ministrja e Mbrojtjes, e shoqëruar ngadeputeti Anastas Angjeli është ndalur edhe në qytetin e Gramshit, aty ku Forcat e Armatosura nisën fushatën e rekrutimit.
“Natyrshëm mund të thoni, po pse duhet të zgjedhim ne sot këtu ta marrim përsipër këtë mision, të bëhëmi pjesë e FA? Sepse e them me bindje, ky mision është veç të tjerave, një profesion. Të bëhesh pjesë e FA do të thotë të fitosh një profesion, dhe jo një profesion si gjithë të tjerët. Është një profesion që ka edhe sakrificën brenda, ka edhe kufizimet brenda, por si rrallëherë, është një profesion që mban më së shumti stemën e krenarisë për veten.
E ndaj sot me ju për herë të parë, këtë thirrje, pasi sot ka më shumë garanci se karriera në FA ju jep jo vetëm një të ardhme, por ju jep edhe shumë më tepër mundësi. Mundësi për të studiuar jashtë vendit të mbështetur nga shteti dhe nga partnerët ndërkombëtarë, mundësi për të marrë shërbime ju dhe familjet tuaja në shëndetësi, arsimim falas, për t'u zhvilluar në karrierë në nivelet më të larta të gradave të ushtarakut, për të qenë qytetarë më i privilegjuar në shoqëri përgjatë, por edhe pas karrierës në FA”, tha ministrja e Mbrojtjes gjatë takimit me të rinj e të reja të qytetit të Gramshit.
Pas Gramshit, ku dhjetra të rinj shprehën interes dhe u regjistruan për t’u përfshirë në fushatën e sapo nisur, “Bëhu pjesë e Forcave të Armatosura”, do të vijojë edhe në Tiranë, Shkodër e Berat, ku kërkesat për elementë të rinj janë të mëdha.
[gallery]24542[/gallery]
dy.b/shqiptarja.com