Në prag të Ditës Botërore të Pastrimit, Ministrja e Shtetit për Rininë dhe Fëmijët, Bora Muzhaqi ka vizituar qytetin e Përmetit. E shoqëruar nga kryetarja e bashkisë Alma Hoxha, së bashku me anëtarët e Këshillit Vendor Rinor Përmet dhe të rinjtë e zonës, u ndalën pranë lumit “Vjosa”, i cili së fundmi është shpallur park kombëtar.
“Angazhimi i të rinjve për mirëmbajtjen e ambientit është thelbësor dhe detyrë e çdo individi që t’i dhurojmë njëri-tjetrit një jetesë më cilësore, duke ruajtur ambientet e përbashkëta dhe bukuritë e mrekullueshme natyrore që vendi ynë zotëron.” u shpreh ministrja Muzhaqi teksa ulur këmbëkryq me të rinjtë e qytetit të Përmetit bisedonin me njëri-tjetrin.
Gjatë bisedës ku Këshilli Vendor Rinor ka treguar rreth punëve që kanë bërë deri më tani, të rinjtë e zonës kanë shprehur edhe çështjet që i shqetësojnë si përfshirja në jetën sociale, për të cilën tashmë bashkia e ka gjetur zgjidhjen. Aktualisht po ndërtohet një qendër rinore për të rinjtë e Përmetit, e cila do të jetë funksionale së shpejti që të rinjtë të kalojnë kohë cilësore me njëri-tjetrin.
Fokus i këtij takimi ishte sigurisht shpallja e lumit “Vjosa” park kombëtar dhe mënyrat se si secili prej qytetarëve mund të kontribuojë për mirëmbajtjen e tij.
SI.E./ReportTv.al