Moti i keq me reshje të dendura shiu ka shkaktuar edhe disa problematika në vend. Bëhet me dije se Aksi Elbasan-Qafe Thanë, në vendin e quajtur kthesat e Murrashit është hapur për qarkullimin e automjeteve. Ky aks u bllokua totalisht mbrëmjen e djeshme për shkak të rënies së inerteve, por mëngjesin e sotëm është hapur, ndërsa qarkullimi i mjeteve po bëhet i kontrolluar për shkak se po punohet për pastrimin e inerteve të rëna.
Ndërkohë aksi rrugor Gjinar-Zavalinë, pranë fshatit Zavaline është bllokuar për shkak të një masivi shkëmbor i cili ka bllokuar qarkullimin e mjeteve.
Problematika janë shkaktuar edhe në rrugën Rrëshen-Kurbnesh, ku rrëshqitja e gurëve ka vështirësua lëvizjen e automjeteve. Ndërkohë po punohet për pastrimin e inerteve. Moti i keq me reshje të dendura shiu ka përfshirë vendin prej dy ditësh tashmë, ndërsa të njëjtat kushte atmosferike do të jenë prezente dhe në ditët në vijim sipas meteorologëve.
Shqipëria është përfshirë nga moti me reshje shiu dhe dëbore në zonat malore. Në veri të vendit, ku reshjet e dëborës kanë qenë të dendura, raportohet se rruga Qafë Thore-Theth është e bllokuar aktualisht për shkak të rënies së një orteku.
