Mjeshtri dhe legjenda ikonë e dirigjimit botëror me origjinë nga India, maestro Zubin Mehta erdhi për herë të parë në Shqipëri me një koncert Gala “Ballkani i hapur” në skenën e Teatrit të Operas dhe Baletit në kryeqytet.
Muzika klasike elitare botërore erdhi e luajtur nga Orkestra Filarmonike e Beogradit në përvjetorin e 100 të themelimit të saj nën dirigjimin mjeshtrit Zubin Mehta duke i përcjellë emocione të ngrohta publikut shqiptar. ‘Virtuozët’ nga Serbia luajtën në kryeqytetin shqiptar si një aktivitet në kuadër të nismës politike për ‘Ballkanin e Hapur’.
Nën tingujt e violinës, violinçelit dhe instrumenteve frymorë për më shumë se një orë, repertorit të koncertit klasik gala nuk i munguan edhe “Simphonia nr 7, e brilantit gjerman Beethoven dhe “Simfonia Fantastike” e kompozitorit të mirënjohur frances Hector Berlioz .
“Ballkani i Hapur” në Tiranë erdhi pasi performancës në Beograd dhe turi do të përmbyllet në qytetin e Shkupit, në Maqedoninë e Veriut.
SI.E.//ReportTv.al