Ministrja e Arsimit, Sportit dhe Rinisë Evis Kushi u ka rezervuar një takim në zyrën e saj vëllezërve Keta, pak ditë pasi njëri nga vëllezërit, Feriti, u shpall kampion bote në sportin e Kickbox-it.
“Kisha kënaqësinë e veçantë të mirëprisja në ministri Vëllezërit Keta, tek të cilët spikat jo vetëm talenti dhe pasioni për sportin, por edhe puna, vullneti dhe sakrifica për të arritur majat e suksesit. Njëri prej tyre, Feriti, sapo u shpall pak ditë më parë kampion bote në Kick-box, në eventin madhështor në Kalanë e Bashtovës”- shkruan ministrja Kushi.
Gjatë takimit me Gjetan Ketën, Ismail Ketën dhe Ferit Ketën, më tej Kushi theksoi se këta sportistë janë model frymëzimi për të rinjtë shqiptarë edhe për vlerat e larta njerëzore dhe kontributin në mbështetjen e talenteve të reja.
“Pikërisht këto vlera i bëjnë ata akoma më shumë kampionë. Krenare për sportistët shqiptarë!”- e përfundon ministrja statusin e saj.
Vëllezërit Keta njihen jo vetëm si sportistë të suksesshëm, por edhe si bamirës me zemër të gjerë.
//ReportTv.al