Ish-godina e Radio Tiranës do të restaurohet ka bërë me dije ministrja e Kulturës Elva Margariti, përmes një njoftimi në rrjetet sociale.
Ministrja Margariti shkruan se Këshilli Kombëtar i Trashëgimisë Kulturore Materiale miratoi projektin për restaurimin e këtij objekti, Monument Kulture i Kategorisë II.
“Një lajm i mirë për trashëgiminë: Ish-godina e Radio Tiranës do të restaurohet! Në mbledhjen e tij më të fundit, Këshilli Kombëtar i Trashëgimisë Kulturore Materiale miratoi projektin për restaurimin e këtij objekti, Monument Kulture i Kategorisë II”, shkruan Margariti në rrjetet sociale.
“E ndërtuar midis viteve 1928-1930, ndërtesa e dikurshme e Radio Tiranës dhe më pas e Institutit të Kulturës Popullore është një nga vilat e para moderne në qytet. Aktualisht ajo paraqet dëmtime të shumta në çati, fasadë, dysheme, dyer, dritare, në elementë të brendshëm e të jashtëm”, vijon Margariti.
“Ndërhyrjet e miratuara në KKTKM, janë konform ligjit 27/2018 “Për trashëgiminë Kulturore dhe Muzetë” dhe në respekt të statusit të monumentit. Ato konsistojnë në restaurime të çatisë dhe dyshemesë, fasadës, vendosjen e dyerve dhe dritareve të reja, restaurimin e kapiteleve, pastrimin dhe lyerjen e kangjellave, plotësimin me sistem hidraulik e elektrik, sistemimin e oborrit të jashtëm etj.”, përfundon reagimin e saj ministrja Margariti, teksa publikon dhe foto të projektit.
M.Q.//ReportTv.al
Komente
Gje e mire. Por, ... PSE nuk u restaurua me pare edhe Teatri Kombetar?! Apo, ... interesa klienteliste!
Përgjigju