Ministria e Financave po harton buxhetin e ri për vitin e ardhshëm, bazuar në tavanet që ka vendosur në Programin Afatmesëm të Buxhetit 2024-2026. Por 8 ministri janë të pakënaqura me shpenzimet e planifikuara në program dhe kërkojnë më shumë fonde për projektet e reja.
Ministria e Infrastrukturës ka kërkesat më të mëdha për rritje të buxhetit, duke kërkuar fonde për infrastrukturën rrugore me argumentin se cenohet mirëmbajtja e tyre, për reformën e ujësjellësve, si edhe për shpronësimet. Për çudi, në 2024-ën, Financat kanë vendosur t’i japin 53.2 miliardë lekë, më pak nga buxheti që kishte këtë vit në vlerën 54.7 miliardë lekë.
As ministria e Arsimit nuk është e kënaqur nga shifra 48.5 miliardë lekë edhe pse është më e madhe se buxheti aktual, 47.1 miliard lekë. Arsimi kërkon më shumë për të mbuluar shpenzimet, për paga personeli, për transport, rimbursim të teksteve shkollore, për trajnim mësuesish, infrastrukturën e akademisë kërkimore shkencore dhe për federatat sportive.
Me ministrinë e Mbrojtjes, Financat janë treguar më dorëlëshuar. Buxheti parashikohet të jetë mbi 5 miliardë lekë më shumë nga ky i vitit 2023. Por ministria e Mbrojtjes ka përsëri kërkesa për mbulimin e shpenzimeve për angazhimet me NATO dhe për pagat. Sipas planifikimit, buxheti i Ministrisë së Mbrojtjes në vitin 2024 do të jetë 45.7 miliardë lekë, nga 40.2 miliardë lekë që është këtë vit.
Edhe ministria e Drejtësisë pritet të marrë më shumë, 12.9 miliardë lekë nga 12.3 miliardë lekë që ka këtë vit, dhe sërish ka bërë kërkesë për fonde shtesë për shpenzime personeli.
Me fluksin e paprecedentë të turistëve që shënoi ky vit, ministria e Turizmit ka shprehu pakënaqësi ndaj parashikimit 2.1 miliardë lekë për vitin e ardhshëm, një vlerë që është edhe më e vogël se buxheti i tanishëm, 2.3 miliardë. Për të qenë në nivelin e duhur, turizmi kërkon fonde për pastrimin e bregdetit, për kalendarin turistik si dhe për blerje fidanësh për administrimin e pyjeve.
Më pak buxhet parashikohet për Ministrinë e Brendshme nga 24.1 miliardë lekë këtë vit në 23.8 miliardë lekë vitin që vjen, e po ashtu edhe për Bujqësinë e cila kërkon më shumë për pagat e personelit, subvencionim e naftës dhe mirëmbajtjen e digave.
Buxheti i Ministrisë së Bujqësisë këtë vit është 14.2 miliardë lekë ndërsa për vitin që vjen është planifikuar në vlerën 13.9 miliardë lekë.
Ministria e Kulturës do të marrë 4 miliardë nga 3.9 miliardë që ka këtë vit, por ky buxhet vlerësohet i pamjaftueshëm për pagat, shpenzimet e personelit, dhe për vendimet gjyqësore
Ministria e Financave, e Shëndetësisë dhe e Jashtme kanë fonde në rritje në krahasim me vitin aktual, por nuk kanë kërkesa për më shumë buxhet.
Tashmë janë ekspertët e Ministrisë së Financave që kanë në dore plotësimin ose jo të kërkesave të ministrive, në përfundim të hartimit të projektbuxhetit të vitit 2024.
Në Programin Buxhetor Afatmesëm është bërë shpërndarja e fondeve për institucionet mbi bazë të objektivave që duhen realizuar për vitin e ardhshëm, për vitin 2026 dhe 2026. Tek Programi Buxhetor Afatmesëm përcaktohen tavanet e shpenzimeve dhe investimeve publike për të gjitha institucionet.
SI.E.//ReportTv.al