Varianti i ri i COVID, Omicron, i cili është përhapur me shpejtësi në shumë vende të botës, ka mbërritur tashmë edhe në Shqipëri. Kështu bëri me dije shefja e Insitutit të Shëndetit Publik, Eugena Tomini, gjatë mbledhjes ditën e sotme të Komitetit Teknik të Ekspertëve, ku tha se janë konfirmuar dy raste, ndërsa shtoi se në vend mbizotëron varianti Delta.
'Janë konfirmuar dy rastet e para e Omicron në vendin tonë. Ndërkohë mbizotëron varianti Delta. Sa i përket incidencës një javore kemi një rënie.'- tha Tomini.
Pavarësisht shfaqjes së variantit të ri të COVID, Komiteti i Ekspertëve njoftoi se nuk do të ketë ashpërsim masash për parandalimin e përhapjes së koronavirusit, pasi sipas kryetares Mira Rakacollit, masat që janë në fuqi mjaftojnë për të kontrolluar situatën. Madje, Rakacolli njoftoi se në natën e Vitit të Ri, nuk do të ketë orë policore për qytetarët si dhe do të lejohen organizimet në lokale, por më kapacitete 30%.
Kryetarja e Komitetit Teknik të Ekspertëve rikujtoi po ashtu se të gjithë punonjësit e administratës publike, supermarketeve dhe qendrave tregtare, duhet të paraqesin certifikatën e vaksinimit, kur të paraqiten në punë. Ndërkohë për shefen e spitalit Infektiv, Najada Çomo, është rritur numri i qytetarëve në moshë të re të shtruar në spitale, të cilët janë kryesisht të pavaksinuar.
Njëzëri, anëtarët e Komitetit Teknik të Ekspertëve i bënë apel qytetarëve të vaksinohen, si e vetmja mënyrë për t'u mbrojtur nga COVID he varianti i ri Omicron.
Masat anti-COVID që janë në fuqi:
Masat e tjera vijojnë si më poshtë:
-Ora policore vijon me orën 23:00 – 06:00. (Përjashtim natën e Vitit të Ri)
-Vijon që qytetarët që hyjnë në Republikën e Shqipërisë, nga të gjitha pikat kufitare apo ata që kalojnë tranzit, duhet të vijojnë të dorëzojnë një nga dokumentet e mëposhtme:
•Pasaportë vaksinimi, ku data e vaksinës së fundit të ketë të paktën dy javë e aplikuar nga data e hyrjes në kufi.
•Test PCR, të kryer brenda 72 orëve ose testin e shpejtë antigenic brenda 48 orëve të hyrjes në kufi.
•Provë të kalimit të infeksionit Sars-Cov-2 të vlefshme deri në 6 muaj pas shërimit.
•Përjashtim nga rregullat e përcaktuara në pikën 2, bëhet për fëmijët deri në moshën 6 vjeç.
•Qytetarët rezidentë të Republikës së Shqipërisë dhe që nuk kanë asnjë nga dokumentet e përmendura në pikën 1, duhet të vetë izolohen për një periudhë 10 ditore dhe të informojnë autoritetet shëndetësore për të kryer një test në fund të periudhës së izolimit.
-Vijon që në strukturën e aerorporteve do të lejohen të hyjnë vetëm pasagjerët që udhëtojnë, të cilët duhet të zbatojnë me rigorozitet mbajtjen e maskës ashtu sic është rekomanduar sipas protokollit të ndryshuar.
-Vijon të mbetet në fuqi që në të gjithë institucionet shëndetësore, moslejimi i hyrjes së familjarëve për personat që janë të shtruar.
-Vijon të mbetet në fuqi urdhri për përdorimin e maskave në ambiente të mbyllura, në qendra tregtare, supermarkete, dyqane etj, e në të gjithë ato vende ku nuk sigurohet distancimi fizik.
-Vijon të mbetet në fuqi urdhri për lejimin e grumbullimeve deri në 50 persona dhe të aktiviteteve kulturore, sportive etj deri në 30% të kapaciteteve të tyre me prezencë të spektatorëve.
Kryetarja e Komitetit Teknik të Ekspertëve, Mira Rakacolli ka bërë me dije se nuk do të ketë ndryshim të masave COVID në vend. Ajo u shpreh se masat që janë në fuqi mjaftojnë për të kontrolluar situatën, ndërsa shtoi se në natën e ndërrimit të viteve nuk do të ketë orë policore, ndërsa do të jenë hapur edhe lokalet, por do të funksionojnë vetëm me 30% të kapacitetit.
"Niveli i masave që janë në fuqi është i përshtatshëm për ta kontrolluar këtë situatë. Do të mbeten në fuqi të njëjtat masa. Por situata epidemiologjike në botë dhe përhapja e Omicron bën të domosdoshëm respektimi e këtyre masave që nuk po zbatohen në nivelin e kërkuar. Studiuesit po bëjnë thirrje për vaksinimin. Infektohen shumë më tepër të pavaksinuarit dhe rastet e rënda dhe humbjet e jetës janë më shumë te të pavaksinuarit. Siç ka thënë dhe Fauci 'Omicron do t'i gjejë të gjithë të pavaksinuarit'. Jemi në prag të festave të fundvitit, mosrespektimi i masave vitin e kaluar solli rritje infektimesh. Të jemi të përgjegjshëm, të respektohen standardet e kërkuara, të përdorim maskat. Ora policore do mbetet e njëjtë, 23:00, me përjashtim të natës së ndërrimit të viteve. Në 4 janar, të gjithë punonjësit e administratës publike, supermarketeve dhe qendrave tregtare, duhet të sjellin certifikatën e vaksinimit", tha Rakacolli.
Drejtoresha e Spitali Infektiv Najada Çoma ka ngritur alarmin dukë theksuar se numri i personave të shtruar në spital në moshë të re është rritur. Po ashtu mjekja tregoi edhe një rast të një pacienti 30-vjeçar, pak para se të ndërronte jetë kishte shprehur pendesë që nuk ishte vaksinuar.
‘Numri i personave të shtruar në Covid 1 dhe 3 ëhstë në gjendje të qëndrueshme rreth 140 pacientë. Numri i të shtruar në spital për moshën e re është i rritur dhe 30% i takojnë grupmoshës 19-40-45 vjeçare. Kategori e njerëzve që janë të shtruar, pjesën madhore e zënë personat e pavaksinuar. Gati në 90% të rastve janë individë të pavaksinuar asnjëherë. Rastet e shtruara në spitale, i takojnë qyteteve të mëdhaj siç është Tirana, Fieri, Durrësi. Do e mbyll diskutimin me fjalën e një 30-vjeçari që ndërroi jetë dhe para se të ndërronte jetë tha sa keq që nuk u vaksinove.’- tha Çomo.
Shefja e Epidemiologjisë dhe Sëmundjeve Infektive në Institutin e Shëndetit Publik, Silva Bino tha sot se ka një rritje të personave të cilët kanë kërkuar të vaksinohen ndaj COVID. Në mbledhjen e Komitetit Teknik të Ekspertëve, Bino u shpreh se në popullatën e përgjithshme, mbulesa vaksinale ka shkuar në rreth 40%, ndërsa në popullatën target, rreth 50%.
"Kemi një rritje të shifrave të vaksinimit që ka sjellë një rritje të mbulesës me vaksina në vend që po arrin në rreth 40% në popullatën e përgjithshme dhe rreth 50% në popullatën target. Aktualisht në vend kanë ardhur mbi 2 mln e 700 mijë vaksina, aktualisht mbizotëron vaksina Pfizer. Përqindje të lartë në lidhje me vaksinimin ka pësuar bashkia e Tiranës mbi 57%, kemi bashki mbi 80% si ajo e Himarës dhe Sarandës. Ka një rritje të aplikimit për dozat e treta", tha Bino.
