Art, kulturë dhe spektakël, në vijim, rubrika “Ciceron”, ju njeh me aktivitetet që mund të ndiqni sot në Tiranë dhe disa qytete të vendit.
1. “Triptiku” i Puçinit me tri veprat e suksesshme “Il Tabarro”, “Suor Angelica” dhe “Gianni Schicchi” vijon të shfaqet sot e nesër në orën 19.00 në skenën e Teatrit të Operas.
2. Teatri i Kukullave jetëson sot dhe nesër në orën 10 e 30 dhe 11 e 30 në sallën "Tonin Harapi" të Liceut Artistik në Tiranë shfaqjen për fëmijë “Borëbardha dhe 7 xhuxhët” me regji të Aldjon Matarangasit.
3. Marie Curie dhe Hertha Ayrton ,guximi i dy grave mike shkencëtare, dhe përkushtimi për t’ia dalë mbanë pavarësisht paragjykimeve propozohet sot e nesër në orën 19.00 në skenën e Teatrit Metropol në Tiranë përmes pjesës “Gjysmë-jeta e Marie Curie” e Lauren Gunderson që vjen me regji të Armela Demajt, e cila interpreton në skenë me aktoren Yllka Mujo.
4. Komedia e Dario Fo “Martesë me kushte” me regji të Altin Bashës e interpretim të Olta Dakut dhe Gazmend Gjokës vijon të shfaqet këtë fundjavë në orën 19.00 në skenën e Teatrit Eksperimental.
5. Komedia “10 vjet martesë” e Alil Vardar dhe me regji të Andia Xhungas, që interpreton në skenë me Gentian Zenelajn, vijon të shfaqet sot e nesër në orën 19.00 në sallat kulturore pranë Komunës së Parisit.
6. Dy çifte në një situatë të komplikuar, komedia me dy akte e Neil Simon “Suita në Hotel Plaza” me regji të Mariana Kondit dhe Elkjana Gjipalit luhet sot në orën 19.00 në qendrën e artit “Agimi” në Tiranë.
7. Vijon këtë fundjavë në Teatrin Kombëtar në orën 19.00 shfaqja “Testamenti” me tekst dhe regji të Leka Bungos dhe interpretim të Viktor Zhustit.
A.D/ReportTv.al