UEFA ka përjashtuar Manchester City nga Champions League për dy sezonet e ardhshme dhe e ka gjobitur me 30 milionë euro për shkak të thyerjes së rregullave financiare. Vendimi është zyrtarizuar pasditen e sotme nga UEFA. Përjashtimi nuk bëhet këtë vit, por nisur nga edicioni i ardhshëm 2020-21 dhe 2021-22. UEFA akuzon klubin anglez për mungesë transparence dhe sponsorizime me origjinë të dyshimtë, pasi ishin të lidhura me kompani të kontrolluara nga pronari i saj, sheiku Mansour bin Zayed.
Pas vendimit, Manchester City reagoi duke paralajmëruar ankimimin e vendimit. "Në Dhjetor 2018, UEFA-s parashikoi publikisht dënimin e Manchester Cityt, madje para se të fillonte çdo lloj hetimi. Në thelb, është një rast i iniciuar nga UEFA, i përpunuar nga UEFA dhe i gjykuar nga UEFA. Klubi do të përpiqet të sigurojë një gjykim të paanshëm me shpejtësinë maksimale prandaj, do të fillojë procedurat për në Gjykatën e Arbitrazhit Sportiv sa më shpejt që të jetë e mundur" thotë klubi anglez.
